Galiza: Eleccións e"fodechinchos" segundo Feijóo (e II)

Poñemos aquí a segunda parte do artigo que leva por título «Galiza: eleccións e “fodechinchos” segundo Feijóo». Poderiamos ter titulado esta parte como «A campaña electoral e o perigo dos “fodechinchos” segundo Núñez Feijóo», pero imos manter o título orixinal.

Campaña electoral

Descartada xa a mobilidade provincial nas Fases Cero e Un, volve Núñez Feijóo (xa coas eleccións convocadas) á carga co tema e solicita para o comezo da Fase 2. É moi posible que a concedan. Posiblemente o pacto acadado entre Goberno central e PNV para acadar apoios ás políticas de desescalada teña algún aspecto deste tipo. Non esquezamos que o goberno vasco tamén ten convocadas eleccións para o mesmo día que o noso presidente vernáculo; e a dereita vasca tamén necesitará mover aos seus peóns electorais.

Falamos na primeira parte de como Feijóo retorce ata estrangular as conclusións dos principais epidemiólogos de Galiza para axeitar os perigos de extensión e de reactivación da pandemia do COVID-19 aos seus desexos electorais. E cando falo dos principais epidemiólogos do país, non me refiro ao que a Consellería de Sanidade e o noso presidente vernáculo chaman “equipo de expertos”. A min os xerentes de áreas de xestión sanitaria, xerentes de SERGAS, xefes de servizo nomeados a dedo e toda a caste de xente que pode estar aí escollida a dedo pola súa fidelidade política ou polo seu comportamento “obediente” non me ofrece ningunha confianza. É dicir, a mesma confianza que me ofrece Núñez Feijóo ou La Voz de Galicia.

Pero si lemos en distintos medios que os expertos non lle dan a razón ao actual presidente da Xunta de Galicia. Así o doutor Enrique Míguez, xefe da unidade de infecciosas do CHUAC, di que se poden esperar dous rebrotes da pandemia neste ano 2020, un “pequeno” nas seguintes dúas semanas e un segundo “dunha amplitude non predecible” cara a finais de xullo (Galicia Confidencial, 13-05-2020).

Incluso os informes que manexa o propio goberno de Galiza indican que a previsible chegada masiva de turistas desde outros territorios nos meses de xullo e agosto pode provocar un aumento da transmisión do virus. Igualmente hai coincidencia entre numerosos especialistas en que o sistema sanitario público está nunha situación de extrema fraxilidade derivada “da pobreza á que se viu sometida nos últimos anos” e que “a precariedade, froito da privatización do sistema sanitario e a falta de investimento en Atención Primaria colócanos agora nunha situación de debilidade. As autoridades deberían entender que o incremento da poboación nas zonas costeiras será importante e debe ter preparado recursos humanos e técnicos para que o sistema de vixilancia e a capacidade asistencial funcionen". (Fonte: Nós Diario, 15 de maio de 2020)

Neste senso, Núñez Feijóo, despois de retorcer os ditames dos especialistas e de, incluso, dar información falsa sobre o número de turistas que se achegan ás nosas costas nos meses de xullo, agosto e setembro (contradicindo os datos feitos públicos polo Instituto Galego de Estatística -IGE- di que setembro é o mes de maior afluencia de visitantes e que por iso non pode levar as eleccións a ese mes no que remata a lexislatura) conclúe que a súa conveniencia electoral está en convocar as eleccións no mes de xullo.

O “perigo dos fodechinchos”. Blindar Galiza.

Todos os estudos realizados ata o momento sobre a transmisión na Galiza e a orixe das cepas do COVID-19 presentes na Galiza conclúen que a súa procedencia hai que situala alén dos límites do nosos territorio, fundamentalmente na zona centro. Suponse, tamén, que foron as fins de semana do 13 ao 15 de marzo e a do 19 ao 22 dese mesmo mes na que a afluencia de visitantes á nosa terra serviu de vehículo transmisor do virus. De feito, os galegos da costa eran conscientes deste perigo, de aí a aparición e extensión polas redes sociais de gráficos con connotacións negativas e lendas como a que aquí se reproduce referidas aos turistas e visitantes. 

Este perigo de transmisión, como manteñen os especialistas, é previsible tamén nos meses de maior afluencia turística de xullo e agosto. E nin Núñez Feijóo nin o responsable da Consellería de Sanidade de Galiza se atreven a negalo. Nun informe elaborado pola Consellaría de Sanidade, de cara a xustificar unha convocatoria electoral non apropiada para a situación sanitaria do país, indícase que "un factor que pode alterar a situación de control da infección na comunidade é a entrada múltiple de persoas procedentes doutros territorios cun nivel de infección superior, que poden iniciar cadeas que pasen desapercibidas nun inicio". E que "durante o mes de xullo o previsíbel aumento do contacto entre persoas, produto da recuperación de actividades até o momento restrinxidas e a posíbel entrada de persoas infectadas, co incremento do número de viaxeiros, podería provocar unha suba da transmisión do virus, que podería dar lugar, ao cabo de varias semanas, a agrupación de casos en territorios concretos da Galiza que obriguen a novas medidas de mitigación xa abandonadas". E que as comarcas máis afectadas van ser as turísticas (fonte: Nós Diario, 15-05-2020).

Aínda asumindo e afirmando Feijóo que a entrada masiva de turistas desde partes do Estado fortemente afectadas pola pandemia é, segundo as súas propias verbas, un perigo que pode significar un rebrote da pandemia, é incapaz de solicitar do Estado que blinde Galiza para evitar esa probabilidade que, tamén, os distintos especialistas (ata os deles) dan como certa. Fica claro que o que lle interesa é a súa carreira política á costa do que sexa; lonxe quedan os tempos de “como se van celebrar unhas eleccións nunha situación de emerxencia sanitaria e estado de alarma?”. Iso agora non importa; dirían eles, os peperos, que o importante é favorecer aos seus amigos hostaleiros de grandes cadeas para que fagan pingües negocios, de mimar aos pequenos propietarios de vivendas turísticas e pequenos bares e restaurantes. Que iso é un perigo en potencia? Cando se poña de manifesto xa eles contan con ter a maioría absoluta no Parlamento Galego para seguir facendo deste país un local de negocios a costa da destrución da súa economía e da súa sociedade, como levan facendo anos e anos.

De aí, tamén, as presas por convocar eleccións. O tempo é o seu inimigo; canto máis tempo transcorra entre a fin do estado de alarma e as eleccións galegas máis tempo vai ter a cidadanía responsable e os medios de comunicación non comprados polo poder para dar a coñecer todos os despropósitos cometidos polos distintos gobernos de Núñez Feijóo e en cuxa base se encontra a case totalidade das miserias e mortes que hoxe asolan ao país por causa do coronavirus, sobre todo o abandono do sistema sanitario público e do sistema de atención á dependencia postos ambos ao dispor e mellor proveito de negociantes e de políticos, moitos deles sen escrúpulos.

Se queres ir á praia debes pedir a vez (e ter un Smartphone ou un I-phone para poder facelo).

Unha das colaboradoras máis “espelidas” do noso presidente vernáculo, Conselleira de Medio Ambiente, Territorio e Vivenda, dona Ángeles Vázquez, tivo unha brillante idea para que a chegada masiva de turistas nos meses xullo, agosto e setembro non supoña unha ocupación das praias que poida provocar o non gardar distancias de seguridade e xerar contaxios por masificación nas mesmas.

Supoño que a estas alturas, pola chunga e cachondeo públicos provocados pola idea, xa todos e todas estarán ao corrente da brillante e rutilante idea de dona Ángeles: establecer unha aplicación pola que os concellos, ao través da asignación de códigos QR, dean turno para poder acceder aos centos de praias que Galiza ten (e poñer en cada unha persoal para controlar que ninguén se coe, claro).

Por se non se lembran a lumieira produtora desta idea é a mesma persoa que solicitou ao goberno central que retirara a prohibición de efectuar desafiuzamentos durante o estado de alarma para non impedir a dinamización do mercado de alugueiros; ou a mesma, se mal non me lembro, que falaba de indemnizar a Autopistas de Atlántico, S.A. polo descenso no tráfico da autoestrada nas primeiras semáns do estado de alarma coincidindo co confinamento e o paro produtivo.

Eu non sei se esta persoa, amais de a propoñer ideas deste tipo, non se dedicará a coleccionar esquinas ou a contar os farois que vai atopando ao seu paso; non me estrañaría, é membro do equipo de Núñez Feijóo.

Como se van organizar as mesas electorais?

Outro dos aspectos dos que Feijóo non quer falar é o de como se van organizar as mesas electorais e os protocolos de votación en pleno estado de alarma pola pandemia. Simplemente deixa nas man da Xunta Electoral a organización do evento, sen dar máis alternativas que a de intensificar o voto por correo.

En definitiva serán as xuntas electorais locais ou provinciais e os concellos quen deben organizar e dispoñer os recursos materiais e humanos para que o proceso electoral poida levarse a cabo. Cantas mesas ?, Onde? , Cantos electores e electoras por mesa?, Como organizar as cabinas de votación para impedir contaxios? Como manter o distanciamento social entre os membros das mesas electorais e entre estes e os electores?, Como esixir a documentación aos votantes e pasala de man en man? Que medidas sanitarias se adoitan para evitar contaxios nos colexios electorais? Só con ver este pequeno número de cuestións que aparecen a bote pronto mostran a inoportunidade desta convocatoria electoral precipitada, mostran que é unha convocatoria electoral ad hoc, a medida dos intereses de alguén concreto e non da maioría da poboación galega. Mais o goberno e o partido de Núñez Feijóo lávase as mans; o que lles interesa é seguir a mangonear.

Como unha primeira medida poderíase prohibir o traer o voto co sobre da casa, obrigando a proverse del no colexio electoral no intre de ir votar. Pero nin PSOE nin PP van admitir que unha das principais formas de captación de voto, sobre todo aqueles procedentes do carrexo de xente desde aldeas e residencias de maiores afíns. 

O voto por correo.

E se hai unha participación masiva no voto por correo? Están as oficinas postais capacitadas en medios e persoal para atender unha masiva afluencia nunhas xestións que, por sinxelas que son, levan o seu tempo entre entrega de impresos, xustificación de identidade, materialización do depósito do voto en correos e hixienización de todos e cada un dos sobres depositados? E posteriormente traslado en tempo dos votos ao colexio electoral correspondente? Non esquezamos que, segundo os sindicatos de correos, o colectivo de carteiros é un dos máis afectados polos contaxios de COVID-19.

Igualmente, a participación do voto por correo require a intervencións das xuntas electorais provinciais. Recepción das solicitudes en papel libre de virus (suponse) , comprobación de identidades, envío de documentación aos solicitantes para que poidan exercer o seu voto, mantemento da hixiene e desinfección de todo o papel que se move en e durante o proceso. Iso require persoal. Hai persoal suficiente nas xuntas electorais para acometer unha labor masiva no voto por correo? Non esquezamos que nas últimas eleccións, debido a un breve aumento no voto postal, as xuntas electorais tiveron que aumentar os prazos para a entrega dos votos e documentacións.

Outro aspecto do voto por correo, no caso de que se masifique, é o referente ás mesas electorais presenciais. Este voto é o último que se mete en urna, unha vez pechados os colexios electorais aos votantes directos. No caso de que a afluencia presencial sexa mínima ás urnas e a meirande parte dos electores e das electoras se decante por utilizar os servizos postais pra exercer o seu dereito a voto que vai pasar? a) Ao ter que estar os membros da mesa ata o remate da xornada e despois abrir masivamente os sobres, clasificar, recontar e cumprimentar toda a documentación; daranlle as tantas antes de rematar o reconto?. b) Quen asegura aos carteiros que trasladan a documentación ata as mesas e ás persoas que compoñen as mesmas que esas documentacións, tanto no seu interior coma no seu exterior, están perfectamente hixienizadas e desinfectadas e non supoñen risco para a súa saúde?

Un despropósito. Cóllase por onde se colla.

Fica máis que claro que convocar unha eleccións con todas estas limitacións e baixo a ameaza da extensión dunha pandemia da que non se coñece case nada é unha temeridade, que sería mellor esperar ata o mes de setembro no que parece que poida haber senón unha vacina si un medicamento que axude a conter os efectos do coronavirus (polo menos os máis nocivos).

E se por mor dun repunte perigoso da pandemia non é posible convocar no mes de setembro, cando tocaría por remate da lexislatura, posiblemente estariamos diante dun novo estado de alarma e unha nova xeira de confinamentos en maior ou menor grao polo que automaticamente esas eleccións poderían volver ser adiadas unha vez máis.

Hai indicios que nos din que as cousas non pintan tan ben na saúde do país como desde hai algunhas semanas pretenden facernos crer o presidente vernáculo e os seus escudeiros: Feijóo di non descartar o ter que suspender o proceso electoral se houbera un rebrote dos contaxios. Iso quer dicir nin sequera este e o seu partido teñen as cousas claras sobre esta nova convocatoria electoral.

En fin, o que diciamos antes: un despropósito feito a medida dos intereses particulares dos convocantes, dos intereses de Núñez Feijóo e do Partido Popular. Sen esquecer os intereses das grandes empresas de hostalería cuxos intereses antipopulares sempre representou o Partido Popular.

O grave problema da información obxectiva na Galiza.

Eu non sei como vostedes verán as cousas desde o punto de vista de poder acceder a unha información independente, completa e obxectiva a través dos chamados medios de comunicación. Medios que non confundan a información coa opinión nin a información coa propaganda; medios que non beneficien e potencien a unhas opcións políticas sobre outras.

Eu teño claro (e esta é unha opinión moi persoal que non ten porque ser asumida por ninguén) que hai medios que non me van servir para informarme con obxectividade do que realmente está a ocorrer na Galiza. E vounos nomear. Dentro da prensa escrita e das súas edicións dixitais editadas na Galiza, a min no me serven como referencia de información obxectiva e fiable La Voz de Galicia, El Faro de Vigo, El Progreso, La Región, Atlántico Diario, El Correo Gallego, Diario de Pontevedra e La Opinión de Coruña. Dentro das limitacións que os diarios impresos de carácter estatal teñen para estenderse sobre a realidade de Galiza, tampouco quero saber nada de El Mundo, ABC e La Razón, de entre os máis significativos, tanto nas súas versións impresas como dixitais por non consideralos fiables e imparciais nas súas informacións (prefiro ler os xornais portugueses que me informan mellor).

Por suposto non so non me fío senón que desconfío das emisoras da Compañía de Radio e Televisión de Galicia, RTG e TVG. Son claramente instrumentos de propaganda ao servizo do Partido Popular e de Núñez Feijóo, coa falta total de imparcialidade e obxectividade informativa que calquera medio público debería ter. E non o digo eu; dino os seus propios traballadores e traballadoras, incluso os de informativos falan de censuras, mencións prohibidas, censuras previas e temas tabú amais de criticar abertamente a política informativa dos citados medios. Póñeno de manifesto os propios traballadores participantes do movemento “Defende a Galega” cada venres desde hai algúns anos.

É dicir, hai pouco onde escoller. Nos xornais diarios estatais impresos Galiza case non existe, está desaparecida do Estado pese a ter graves e variados problemas tanto económicos como sociais, agravados de forma recorrente en cada actuación do goberno de Núñez Feijóo; parece que só aparecemos nos medios dixitais ou escritos estatais cando hai algunha desgraza. Antes tiñamos a edición galega de El País; non é que fora gran cousa pero era información, con matices pero información.

Que é o que nos queda? Fundamentalmente os xornais diarios editados en dixital Galicia Confidencial, Praza Pública e Nós Diario (este editado tamén en papel) así como informativos de carácter local editados dixitalmente dos que sempre se saca algo positivo. Que é o que nos queda? Fundamentalmente os xornais diarios editados en dixital Galicia Confidencial, Praza Pública e Nós Diario (este editado tamén en papel) así como informativos de carácter local editados dixitalmente dos que sempre se saca algo positivo. E tamén xornais diarios estatais editados en dixital como publico.es, eldiario.es, elconfidencial.com, cxtx.es, elsaltodiario.com e outros minoritarios que entre información e colaboracións van aportando información obxectiva sen misturar opinión-información e sen sesgos (ou con poucos) na exposición das novas.

E emisoras de radio comerciais? Pois nada aquí volvemos a ver a non confiabilidade. A min non se me ocorrirá tentar de informarme do que realmente ocorre pola Radio Popular, nin pola redacción local de Radio Vigo, nin por Radio Voz ou ES Radio. Podo escoitar Onda Cero ou a rede estatal da Cadena SER, ambas con moitas cautelas separando o que é información do que é opinión cando estas vanmisturadas.

Votar para botar.

E niso estamos. Asi que a votar o día 12 de xullo. E, sobre todo, a votar para botar á pandemia pepera do goberno da Galiza.

Galiza: Eleccións e"fodechinchos" segundo Feijóo (I)

O noso presidente folclórico e vernáculo, o señor Núñez Feijóo, como era de esperar, non puxo nada da súa banda para defraudar aos agoireiros que falaban de que ía convocar eleccións en plena pandemia do COVID-19. Teremos que acudir ás urnas o domingo 12 de xullo, ou votar por correo previamente. E deberemos facelo, a ver se nos desfacemos dunha vez por todas de esa grave enfermidade que ten Galiza e que se chama Partido Popular. Alternativa proposta? Eu teño as miñas preferencias, loxicamente, pero diante da posibilidade de seguir gobernado pola dereita franquista do Partido Popular ou por unha alianza desta cos nazi-fascistas calquera outra alternativa éme válida.

Faino retorcendo ata estrangular os distintos argumentos dos científicos sobre o previsible futuro dunha extensión da pandemia na Galiza acompañado dun rebrote dos contaxios e, conseguintemente, do colapso dun sistema sanitario público que segue a estar infradotado tanto en persoal como en medios técnicos para atender unha nova onda de contaxios. Deixando claramente á vista que, desde o primeiro momento do aprazamento das eleccións acordado no mes de marzo ou abril das eleccións galegas toda a súa actividade de busca de culpables para as desfeitas da que só el e os seus administradores son responsables, estaba supeditada á unha campaña electoral máis ou menos encuberta.

Esta convocatoria electoral dáse nunha situación na que unha Consellería de Sanidade, xunto coa súa tropa de administradores das distintas áreas de xestión e dos xerifaltes do SERGAS, nomeados todos eles a dedo e con motivacións fundamentalmente políticas non parece disposta a remediar as carencias do sistema sanitario público sobre o que ten plenas competencias; nin Núñez Feijóo disposto a esixirllo. Nin nas áreas de atención primaria, nin nas áreas de atención especializada e hospitalaria. Como di a célebre canción dun dos “artistas” bandeira do Partido Popular: la vida sigue igual. De feito, as contratacións de persoal en prácticas para facer fronte á dura sacudida do virus nunha Galiza cunha sanidade pública desmantelada por Feijóo e os seus mercenarios, contratacións pensadas para o momento de apuro, son prorrogadas ata un ano en detrimento das listas de contratación de persoal con experiencia abertas no SERGAS; un bordeo da lei máis por parte dos incompetentes xestores dun servizo público esencial como é a sanidade seguindo as directrices do Partido Popular.

Pero amais, estas carencias vanse por de manifesto nun período post-electoral no, que se alguén non o remedia, imos estar nunha situación na que os centros de saúde e urxencias hospitalarias van estar (como todos os meses de xullo e de agosto) saturados pola afluencia de turistas á Galiza; e, por riba, cos cadros de persoal aínda máis diminuídos e compostos en gran parte por persoal en prácticas. Excepto que se lle neguen as merecidas vacacións a uns sanitarios e a unhas sanitarias que nestes últimos meses estiveron traballando a reo, forzando as súas posibilidades físicas e psicolóxicas e maltratados por unha administración sanitaria infectada de cargos “obedientes” e cargos políticos, todos nomeados a dedo, que os explota e precariza laboral e profesionalmente e os reprime se alzan a voz contra os desleixos, temeridades e inxustizas que cometen (aínda que de cara ao público eses vergoñentos lambecús e esas vergoñentas chupa-pollas aplaudan todos os días ás 20:00 horas; e aínda que cada día se lles encha a boca de verbas hipócritas que despois os seus actos desmenten).

Fica claro que ese presidente folclórico e vernáculo, o señor Núñez Feijóo, non quere dar tempo a que se poida dar publicidade a todos as barrabasadas que el cos seus equipos políticos cometeron na Galiza. Barrabasadas que xeraron centos de mortes en residencias de maiores privadas ou que eles cederon en xestión privatizada. Onde se denota unha clara connivencia cun grupo empresarial dedicado ao negocio da atención á dependencia con múltiples residencias de maiores e de centros de día, con altos beneficios económicos resultado do desleixo da administración dirixida por Núñez Feijóo; grupo empresarial e ao que se lle concedeu a xestión de residencias de propiedade pública non se sabe moi ben por que, pero que si se sabe que eran escasos en persoal e medios para atender aos residentes e que xa houbera denuncias e queixas dos familiares das persoas alí mal atendidas. 

Está claro que queren ocultar todas as barrabasadas que xeraron nos moitos anos que levan desgobernando Galiza, que non queren dar tempo a que a poboación poida atar cabos e ver que os gobernos de Núñez Feijóo e do Partido Popular son os máximos culpables do abandono que está a sufrir este país, de todos os problemas sanitarios (xa sinalados en distintos artigos deste blog) que asolan ao sistema sanitario público de Galiza, da precariedade da contratación e da escasez de persoal nos servizos públicos, así como un desleixo programado na xestión dos ERTEs que impediu que moitos dos traballadores e traballadoras afectadas poideran cobrar o que lles correspondía no tempo que debería cobralo. E moitas outras barrabasadas máis; e iso só no período de dous meses, do pasado marzo ata hoxe, que se me poño a mencionar todas as que fixeron ou dixeron Feijóo e os seus conselleiros e conselleiras nestes dous meses remataría cando tivera máis anos que Matusalén. Xa non digo se nos centramos nos anos que leva presidindo o goberno da Galiza, porque entón non chegarían tres vidas do famoso Matusalén para contalas todas..

Mobilidade interprovincial ao comezo da “Fase 0”.

Cando Feijóo decidiu que as eleccións tiñan que ser celebradas no verán, cousa que sucedeu ao pouco de que o goberno central implantara o estado de alarma e estimara a duración probable do mesmo, todas as actuacións del e do seu partido puxéronse en termos de campaña electoral; a saúde da poboación, a pesar das súas continuas declaracións, ficaba nun plano secundario. Para el o importante era el e as súas ansias de revalidar o mandato.

Ao pouco de comezar a chamada “Fase 0” da deses calada, a primeira petición que desde a Xunta de Galicia se fixo ao goberno central foi a de permitir a mobilidade interprovincial en toda Galiza. Coñecendo o percal e os personaxes queda claro que a verdadeira intención do Partido Popular e de Núñez Feijóo non era que poidéramos visitar aos nosos seres queridos ou aos nosas amizades que vivan en localidades de distinta ou da mesma provincia. A verdadeira intención que tiña esta solicitude era a de poder espallar por toda Galiza, fundamentalmente nun medio rural por el maltratado aos seus axentes electorais; empezar a deixar cabos atados e contactos nos diversos lugares; engaiolando coas mais diversas artimañas, prebendas e medias verdades convenientes a unha poboación desinformada coa finalidade de poder pulsar os resortes electorais cando así o requirira a cuestión. E máis cando se supoñía que ía ser unha campaña curta, como parece que se confirma. Ter tocados aos seus peóns no rural é unha cuestión básica para Feijóo e o Partido Popular; o medio rural é unha das súas bases electorais fundamentais e, á súa vez, é un medio no que os caciques e medio caciques rurais móvense moi ben e, coa inestimable colaboración da Televisión de Galicia, prometen o que nunca cumpren. Afortunadamente para saúde física da poboación, o goberno central fixo caso omiso de tal pretensión.

Feijóo quer perpetuar a PPandemia PPolítica de Galiza

Daba noxo ver como estes días atrás un grupo mais ou menos elevado de "pijos" e "pijas" do barrio madrileño de Salamanca manifestábanse pola rúa ao pedindo "Libertad" e saltándose toda mínima precaución para impedir contaxiar ou ser contaxiado polo COVID-19. Esa tropa de "pijos" e "pijas" de variadas idades que pedían liberdade tiñan varias cousas en común: a de votar masivamente ao Partido Popular ou a Vox, a de añorar ou ser firmes partidarios do réxime do xeneral Franco e a de condenar o dereito doutras xentes a pensar de forma diferente á da que eles pensan. Non é que lle moleste que sexa o PSOE, Podemos, Esquerda Unida ou calquera outro quen goberne; o que realmente rexeitan e que non gobernen os seus, os que aproveitan as maiorías parlamentarias para baleirar de contido as liberdades democráticas promulgando leis como a Lei Mordaza ou artigos do Código Penal que atacan frontalmente a liberdade de expresión, asociación e reunión. O que non aceptan eses energúmenos é o non poder exprimir de forma descarada e sen control aos seus asalariados, tanto nas súas empresas como nos seus domicilios ás traballadoras do fogar, ás que terán maiormente en condicións irregulares, de escravitude e con salarios de miseria.

          Si, son xentes coma os manifestantes do barrio de Salamanca madrileño as que votan a políticos como Núñez Feijóo, as que votan a xente que supoñen unha verdadeira pandemia política para calquera país, a políticos que, por moito que traten ás veces de ocultalo ou disimulalo durante as súas campañas e precampañas, son membros do Partido Popular.

       Núñez Feijóo é un suxeito ao que tamén vai votar se pode Marcial Dorado, o narcotraficante preso en Teixeiro que, coa súa escala de valores, di que o actual presidente da Xunta de Galicia é un personaxe honrado. E iso a pesares de que este nega ter amizade con aquel; e a pesares que, segundo verbas de Marcial Dorado, Núñez Feijóo foi beneficiario dos almorzos servidos pola esposa daquel na súa vivenda de Baiona. Claro que iso de durmir, almorzar na casa de un e de ir a variopintos viaxes xuntos non quer dicir que, necesariamente teñan amizade. Foi un que atopou pola rúa e convidou a durmir na súa casa, almorzar alí e despois collerse unha viaxe coa neve (...perdón) irse de viaxe á neve e a navegar na "lanchiña".

         En fin, cousas así son as que representa Alberto Núñez Feijóo, candidato polo Partido Popular á Presidencia da Xunta de Galicia. Adalid das liberdades segundo os moradores do barrio de Salamanca, Vox e Díaz Ayuso e da honradez segundo os códigos éticos de Marcial Dorado.

        Conclusión, se  nas próximas eleccións galegas, próximas a convocar, volve ter maioría o Partido Popular e saír escollido Núñez Feijóo como Presidente da Xunta, a noxenta e nauseabunda pandemia política seguirá vixente na Galiza; e, se a maioría dos expertos en epidemioloxía, medicina preventiva e saúde pública non erran nas súas previsións, esas eleccións e as persoas elixidas virán acompañadas dun novo rebrote do coronavirus COVID-19; un novo rebrote que vai coller outra vez en cueiros á rede sanitaria pública, como xa aconteceu na primeira onda da pandemia. E todo por dedicar máis recursos a forxar propaganda electoral que a afortalar o sistema sanitario público.

 

Falsidades, sen vergonzas e publicidade na época do COVID-19 (O “presidente vernáculo”) ( e 6)

Aínda que xa falamos da noxenta oposición feita polas dereitas franquista, nazi-fascista e os seus apéndices de nome distinto, este artigo irá referido ao presidente do Partido Popular na Galiza, e tamén presidente da Xunta de Galicia, o ínclito, o preclaro, o insigne, o ilustre,... don Alberto Núñez Feijóo. É claro que a actuación política deste suxeito non se pode separar da estratexia xeral que o seu partido ten para o ámbito estatal, polo que será necesario seguir facendo referencia á intelligentia pepero-voxera do resto do Estado como pode ser, por exemplo, o grande descubrimento da portadora da sapiencia do século XXI, a señora Díaz Ayuso, ou do máster pola URJC señor Casado, ou a xa coñecida sapiencia de Rocío Monasterio ou de Ortega Smith (non poño a colección completa de persoas xeradoras de nauseas porque igual me poño a vomitar e non paro).

Pero volvamos ao suxeito principal deste artigo, don Alberto Núñez Feijóo. Non sei se denominalo presidente folklórico, presidente castellanito (non pola súa procedencia xeográfica, que el é dunha aldea da Galiza, senón pola súa ausencia case permanente do idioma propio da súa aldea e da Galiza -o galego- cando realiza declaracións referentes á pandemia ou outros asuntos na súa función de cargo público; e deixando claro que as persoas casteláns que cren e practican a democracia son moi respectables), presidente enxebre, presidente autóctono, presidente indíxena (isto xa sería dorarlle en exceso a pílula aos finos pailáns centralistas que nos miran aos galegos coma tales) ou presidente vernáculo. Poderían ser moitos máis. Ao final decántome por unha acepción moi usada na época da Sección Femenina e da OJE dos fascistas de Franco, que fai máis xogo co personaxe, a de presidente vernáculo. Ía dedicarlle un artigo exclusivo pero, coa velocidade que vai este tema da pandemia, o confinamento, a “desescalada”, etc. córrese o perigo de que as cousas vaian ficando no atraso ou que se acumule un exceso de elementos que, de falar deles, compre facelo sen atrasos para non ficar obsoletos.

Se confiamos nas súas palabras, ao noso presidente vernáculo da Xunta de Galicia o que lle interesa nestes intres e o que move todas as súas actividades é frear a pandemia; que o das pendentes eleccións ao Parlamento Galego xa se verá cando as cousas estean máis calmadas. O problema estriba en que eu non teño nin un ápice de confianza nel nin nas súas palabras; e se alguén me pregunta pola súa fiabilidade direille que ao meu entender é unha persoa que non ten ningunha credibilidade. E os feitos din que está facendo campaña electoral e buscando o momento propicio para continuar co proceso electoral en suspenso. Eu non lle creo nada porque xa estou acostumado ás súas continuadas informacións erráticas ou as súas continuadas mentiras; leva así máis de dez anos; desde antes incluso de ser presidente da Xunta de Galicia, tempo no que fixo unha pre-campaña e unha campaña electorais sementadas de falsidades contra os seus opoñentes políticos; sei da súa manía de botar a culpa das súas decisións e actos a terceiros cando coida que a estas non hai por onde collelas e poñen de manifesto o seu desleixo e a súa incapacidade para gobernar. Aí están as súas recentes afirmacións de que agora hai máis médicos, ou de que hai máis camas hospitalarias na Galiza, que antes do seu goberno; ou que a falta de EPIs e mascaras de protección nos centros sanitarios galegos é culpa do goberno central. E iso con só ollar para estes últimos días.

Sanidade, Educación e Vivenda ou a incompetencia disimulada.

É evidente, tamén, que non podemos separar as súas incompetencias, limitacións e prepotencia das actuacións dos seus conselleiros e conselleiras. Así vemos que cada vez que o Conselleiro de Sanidade fai declaracións sobre a pandemia nos programas locais da emisora da SER en Vigo , por poñer un exemplo, non ten empacho algún en afirmar que gracias a que se construíu o hospital Álvaro Cunqueiro de Vigo esta cidade conta con máis recursos para facer fronte ao COVID-19; a realidade é que o goberno de Feijóo pechou numerosas camas hospitalarias públicas nesa cidade, que reduciu o número de camas hospitalarias previstas para ese hospital, que ía ser plenamente público e que o Partido Popular converteu nun centro comercial privado. E que, tamén, reducíu persoal en toda clase de traballos sanitarios tanto hospitalarios como na atención primaria ao longo do seu mandato; incluso agora, en plena pandemia, está a rescindir e a non renovar contratos ao persoal sanitario.

Outra mostra é a ineficiente e incapaz Conselleira de Educación, que non ten empacho en botarlle ao goberno central as culpas de que a Xunta non teña anulado antes, como teñen feito hai tempo outras comunidades, a convocatoria de oposicións ao ensino público, cando as competencias no tema son plenas e exclusivas (agás os temarios da maioría das especialidades) da Xunta de Galicia; ou que é incapaz de tomar decisións sobre un final de curso coordinado e igual para todo o ensino non universitario de Galiza, que deixa nas mans de cada claustro que faga o que estime oportuno, a la vaicheboa; asi, a un alumno ou alumna de Mazaricos se lle pode avaliar de diferentes contidos e con criterios diferentes que a outro do mesmo nivel de Ribadeo ou do Barco de Valdeorras. Ou, se así alguén o decide (claustro, departamento, área ou profesor) poderíase avaliar, polos mesmos contidos e cos mesmos criterios, a un alumnado que teña posibilidades de acceso ás redes e puidera seguir as clases virtuais de quen as impartira que a outro alumnado do mesmo grupo e nivel que non ten acceso (sexa cal sexa o motivo) ás redes informáticas e non pode seguir as ensinanzas impartidas por ese medio. Un total despropósito e unha deixación de responsabilidades o desa señora conselleira, e, por engadido, o do seu xefe.

Ou a “ocorrencia” da Conselleira responsable de vivenda da que xa falamos nun capítulo anterior desta serie que se dirixe ao goberno central para que derrogue a norma que impide os desafiuzamentos mentres dura o estado de alarma porque enfría o mercado e prexudica aos propietarios. Todo un despropósito se o vemos desde o punto de vista de garantir uns mínimos de condicións de vida para as persoas que polos seus despedimentos do traballo, pola falta de ingresos derivada da pandemia, ou simplemente porque a burocracia e tardanza da Consellería de Traballo ao xestionar os ERTEs impide que poida cobrar en abril o que lle corresponde non poden facer fronte aos pagamentos dos alugueiros (por exemplo: vemos que moitas traballadoras domésticas foron despedidas ilegalmente polos seus patróns ao inicio do estado de alarma; e sabemos que unha inmensa parte das mesmas non están dadas de alta na Seguridade Social, polo que non teñen dereito a paro e tampouco ingresos con que pagar a renda; e sabemos tamén que a maioría dos patróns que fan estas cousas son xentes acomodadas e que votan á dereita).

Máis estes despropósitos non son casuais nin improvisados. Están todos dirixidos á base electoral do Partido Popular e, polo tanto, forman parte da campaña de Núñez Feijóo cara ás eleccións galegas, que leva en campaña desde que tivo que adialas por mor da pandemia e o estado de alarma e non a deixa aínda que se lle colguen dos chilindríns. Iso si, di que o que a el lle importa son as persoas; non sei si se refire ás que se contaxian nos hospitais por falla de medios de protección, se fala dos maiores que sofren en “residencias integradas” porque faltan as camas hospitalarias públicas e o persoal para atendelas que a Xunta do PP pechou e despediu; ou se fala das coidadoras e coidadores de maiores nas residencias que non teñen EPIs porque nin a Xunta nin as súas empresas os facilitaron; ou se fala dos vellos e vellas que finan nos morredeiros nos que se converteron algunhas das residencias nas que moran e ás que o desleixo e privatización por parte de quen debería velar por eles está tendo como consecuencia numerosos falecementos. E a culpa non é da Xunta... Como pretende Feijóo que creamos o que di?

A comedia electoral do “estudo epidemiolóxico” (ou o baile dos 100.000 test).

Outra das pantasmadas do noso presidente vernáculo está relacionada cos test do COVID-19. Parece ser que o goberno central remitiu ao goberno de Núñez Feijóo un número importante de test para que foran realizadas as probas entre as persoas máis expostas a poder ser contaxiadas polo virus, nomeadamente persoal sanitario e auxiliar de hospitais e centros de saúde, persoal de limpeza de hospitais, persoal de residencias de maiores, persoal de ambulancias, etc.; e a Xunta de Galicia non nega esta recepción. Como sabemos pola prensa, a realización de test a todo o persoal foi unha reivindicación constante de todos os colectivos implicados na atención directa aos doentes e potenciais doentes do coronavirus, e a día de hoxe sigue a ser das máis demandadas polo persoal da sanidade e polos técnicos das ambulancias. Pois nada, o señor Feijóo, coa habilidade demagóxica e a sapiencia que o caracterizan, decide que eses 100.000 test non se van dedicar a detectar a presencia do coronavirus entre a poboación en situación de maior risco, senón para facer un estudo electoral... (perdón), ...epidemiolóxico entre a totalidade da poboación galega. O cal non estaría nada mal se os resultados deste tipo de test foran definitorios do estado do COVID-19 na Galiza, cousa que non é así porque este tipo de test debe ser complementado con outros dous para ser definitorio debido ao seu alto índice de erros nos que pode considerar positivos a negativos ou viceversa. Pero aínda está peor se temos en conta que xa estaba anunciado polo goberno do Estado a realización dun verdadeiro estudos epidemiolóxico, con un alto número de mostras, e por tanto cun alto índice de fiabilidade, entre o conxunto da poboación do Estado; estudo que non só comprendería os test que pretende facer Núñez Feijóo, senón que levaría dúas probas complementarias que sinalarían non só a presencia do virus en enfermos contaxiados e asintomáticos, senón que mostrarían ademais as persoas non enfermas pero con anticorpos do COVID-19 por ter pasado xa a enfermidade. 

En suma, este chamado “estudo epidemiolóxico da Xunta de Galicia” é outro esperpento máis, protagonizado pola Xunta de Galicia presidida por Núñez Feijóo; esperpento que só ten senso se é analizado coma unha parte máis da súa campaña electoral. Campaña que, neste caso, utiliza á poboación galega coma se un coello de indias se tratara, servíndose das súas ansias e dos seus medos e proporcionando resultados que seguramente non están axustados á realidade, cousa posta enriba da mesa polo persoal sanitario que á vista dos resultados tiña fundadas dúbidas da utilidade real do rimbombante estudo. Iso si, despois das declaracións neste senso dos facultativos sobre a máis que posible tomadura de pelo, hai tres días que nada se sabe do tema; nin sequera os xornais afíns ao Partido Popular (todos menos un dos galegos editados en papel) falan do tema, o cal me inclina a crer que ou ben ocultan os resultados ou ben prefiren xa calar co tema debido á súa demostrada incompetencia.

A desescalada segundo o noso presidente vernáculo.

Unha das constantes da critica das dereitas extremas (Partido Popular e Vox) ao goberno do Estado foi a de actuar de forma improvisada, sen bases reais sobre as que sustentar a maior parte das medidas, chegando a falar incluso de “arresto domiciliario” da poboación e de secuestro das competencias das comunidades autónomas (CC.AA.). E, ultimamente, acusando ao goberno central de atentar contra as liberdades democráticas “de los españoles”. E Feijóo, por moito que vaia de moderado, non ía ser menos que os seus correlixionarios e apuntóuse ao coro. Mais, quenes son eles, Feijóo e o resto dos peperos e peperas, para falar de atentar contra as liberdades democráticas e do secuestro de competencias das CC.AA.? Lembremos que os maiores atentados ás liberdades democráticas básicas (manifestación, expresión e asociación) foron perpetradas por gobernos do Partido Popular coa aprobación da chamada Lei Mordaza e coa reforma do Código Penal en sentido fascista, sendo presidente do goberno central Mariano Rajoy, Presidenta do Congreso Ana Pastor e sendo deputado Pablo Casado, que por suposto votaron favorablemente xunto cos demais franquistas do seu grupo parlamentario; medidas que supuxeron o asasinato de principios básicos de calquera democracia perpetradas polas novas xeracións de franquistas agrupadas no Partido Popular; do mesmo xeito, e durante este mesmo período, foi cando se produciu a maior recentralización do Estado en detrimento das competencias das CC.AA. desde a instauración do chamado estado das autonomías ou de "café para todos". E logo, de que falan? Certo é que na daclaración da loita contra a pandemia do coronavirus se quebraron en demasía as competencias da CC.AA., que posiblemente non facía falta chegar aos extremos que se chegaron en moitos aspectos e que podía ser posible chegar a acordos sobre medidas e forma de cumprilas, tanto as iniciais como as de da desescalada do estado de alarma. Evidentemente, non saberiamos cal sería a actitude do Partido Popular que posiblemente non sería nada construtiva; pero hai outros actores políticos no taboleiro estatal distintos de PSOE e Partido Popular aos que non se lles respectou a súa propia personalidade desde o Goberno. Pero iso non lle pon razón aos incompetentes peperos.

No mesmo día ou ao seguinte de anunciar a realización do seu test electoral, Núñez Feijóo, sen ter bases nas que sustentar nada, e incluso sen ter os resultados do seu test, púxose a pontificar como debería ser a desescalada en Galicia con críticas ao goberno central polas súas propostas neste terreo. E como ía ser a desescalada de Núñez Feijóo? Foi anunciado este desexo cando aínda non comunicara o goberno central como ía ser a reincorporación paulatina á normalidade. Segundo podemos ler en La Voz de Galicia en nova do 25 de abril (o xornal máis próximo, por non dicir apegado, ao Partido Popular) a desescalada segundo o noso presidente vernáculo consistía, a grandes trazos, no permiso para a apertura de concesionarios de automóbiles, de permitir facer deporte individual, abrir mercadillos de proximidade con limitacións e abrir certos establecementos comerciais con cita previa. Un xenio o noso presidente vernáculo. A intención era máis que clara: botarlle os cans e os cabreos contra o goberno central e os seus apoios no Congreso. Táctica electoral clásica no Partido Popular cando nada novo ten que dicir. Na Galiza, seguía a campaña de Núñez Feijóo e este negando a súa existencia.

O seu lema: “Sigamos a cabrear ao persoal e manteñamos a nosa campaña electoral”.

O Partido Popular non ten alternativas reais para propoñer nin no momento actual nin no momento futuro para controlar a extensión da pandemia. Se eles estiveran no goberno do Estado faríano peor que o goberno actual, porque non establecerían nin unha soa medida de protección para os traballadores asalariados nin para a conciliación laboral (con isto non quero dicir que considere suficientes as medidas adoitadas polo actual goberno para protexer aos máis débiles dos efectos económicos do andazo do coronavirus).

Por iso, a única vía que teñen eses sen vergonza das dereitas é a de lograr o cabreo social contra a xestión gobernamental dunha cidadanía desorientada e asustada pola pandemia, incluso facéndoo responsable das propias actuacións da dereita onde ten responsabilidades de goberno exclusivas. E esta é unha via que saben manexar perfectamente e que xa lle ten dado resultados anteriormente.

Esta falla de alternativas pola banda dos peperos, as presións dos seus aliados sociais e mantedores, sobre todo os grandes empresarios, e as ansias de facer caer ao actual goberno e así de poder para dirixir un goberno de extrema dereita ultraliberal para o período post-pandemia están levando á dereita franquista e nazi-fascista, baixo a dirección do Partido Popular, a adoitar posturas que van contra calquera forma ética de exercer unha oposición democrática, incluso creando falsas expectativas entre a poboación ao insinuar de forma indirecta e subliminar que a extensión do contaxio xa está controlada e non fai falla manter o estado de alarma (así estamos a ver que a xente non coida na rúa as medidas mínimas de precaución que médicos e epidemiólogos aconsellan; e xa veremos, se saen coa súa, como será a dinámica do rebrote que se espera para o outono). Eles o que buscan é un goberno que poida aplicar unhas medidas aínda máis duras e agresivas contra a clase traballadora que as que o actual goberno vai a aplicar por moita Esquerda Unida e moito Podemos que teña no seu interior (neste senso a experiencia de Tsipras en Grecia é moi ilustrativa).

Os que levamos anos interesándonos pola liberdade e a democracia neste país temos moi claro que a dereita franquista e a dereita nazi-fascista non ten escrúpulos nin ética á hora de utilizar calquera cousa ou engado para establecer un clima de cabreo e malestar na sociedade e contra un goberno. Sabemos que utilizan todo o que teñen ao seu alcance, sobre todo a mentira sistemática e as cloacas do Estado que se preocuparon de crear e alimentar nas súas épocas de goberno e poñendo ao fronte de organismos que deberían garantir a seguridade do conxunto dos cidadáns e non os intereses da corrupción a suxeitos corruptos e indesexables; todo para lograr os seus propósitos. Amais teñen múltiples voceiros entre o lixo que invade á maioría os medios de suposta información do país, incluso moitos dos públicos, mensaxeiros da desinformación, da manipulación e da extensión das falsidades creadas pola dereita franquista e a outra extrema dereita. Unha manipulación mediática en toda regla. E o goberno da Xunta de Galicia, presidido por Núñez Feijóo, e os seus medios amigos tamén están nesa verbena de falta de ética; e aquí aínda máis agudizada por esa evidente campaña electoral que nega unha e outra vez o presidente do Partido Popular de Galicia e da Xunta de Galicia, o noso presidente vernáculo.

Unha manifestación desa falta de escrúpulos que ten a dereita franquista foi a imposición da ralentización da tramitación dos ERTEs no Servizo Galego de Emprego, como teñen acusado os sindicatos, atrasando os cobros que aos que tiña dereito a clase obreira afectada no mes de abril. Insinuación de culpa contra o goberno do Estado por parte de instancias da Xunta de Galicia e do Partido Popular, apoiados polos seus voceiros de información veraz e independente. Parella a esta rastreira e impresentable forma de actuar, ofrecen créditos ás familias ás que previamente lles nega vía burocracia o cobro do seu salario; créditos que non sei como serán pero aos que posiblemente, tendo en conta a forma de actuar dos distintos gobernos galegos liderados polo Partido Popular, non poidan acceder os máis necesitados.

Agora os intentos de xerar cabreo van dirixidos aos pequenos comerciantes e ás limitacións que o goberno central decretou para a apertura de establecementos comerciais e de restauración. Non se acorda que na súa proposta de desescalada as medidas aínda eran máis duras que as anunciadas polo goberno central para adoitar a partires do 11 de maio. Está claro que quere alporizar aos pequenos empresarios e traballadores autónomos, á súa base electoral máis fiel e, ao mesmo tempo, esnaquizada por eles.

Posiblemente, e temporalmente, se chagaran ao goberno do Estado os franquistas crearían unha especie de esmola social temporal (nada que ver cunha renda social permanente para os máis desfavorecidos nin coa renda básica, con e sen pandemia, coa que a dereita e os empresarios non están de acordo) que servira aos seus protexidos para manter un mínimo de vendas e para aplacar o descontento social. Isto o estaba pedindo ata o señor Guindos desde a súa poltrona da Unión Europea e o señor Montoro, antigos ministros de Economía e de Facenda, respectivamente, con Mariano Rajoy; curiosamente dous dos principais artífices da ruína e da precariedade da clase obreira e dos pequenos e medianos empresarios durante o tempo que sucedeu á crise do 2008; e un deles, o legalizador do fraude fiscal ao través das famosas “regularizacións fiscais” ás que se acolleron unha gran parte da xentalla afín ao seu partido e que estafou e roubou ao erario público do Estado, entre eles gran parte da familia Borbón, familia da nobreza parasitaria con unha tradición secular de corrupción a conta dos bens públicos.

A represión como remedio contra as críticas internas.

Outra dos signos característicos do goberno Feijóo, que se volveu poñer de manifesto nesta época da pandemia, é a de calar toda discrepancia que poida xurdir no interior da administración autonómica, sobre todo se esta discrepancia sae a luz ou se fai pública. Dous casos mostran este tipo de comportamentos nesta época de pandemia. O primeiro foi a destitución da xefa do servizo de cirurxia plástica e reparadora do Hospital Álvaro Cunqueiro de Vigo por facer públicas no seu Facebook persoal as presións ás que estaba sometida pola dirección do citado hospital debido á insistencia da profesional en usar máscara de protección e esixir medios de protección individual para atender aos doentes nunha etapa na que os contaxios por COVID-19 estaba a crecer en progresión case xeométrica. A escusa para a destitución foi a de falta de confianza; isto para unha profesional que ten fama de ser moi concienciuda no seu traballo, no coidado dos doentes e unha excelente compañeira. A verdade todos supoñemos que non foi esa, senón a actitude da doctora. E por moito que o neguen non imos crer outra cousa.

Outro caso é a destitución como director da residencia integrada de Baños de Molgas de un especialista en xerontoloxía, destitución materializada ao día seguinte de que ese xeriatra realizara unhas declaracións á Cadena SER en Galiza que poñían en cuestión algunhas das actuacións da Xunta de Galicia ao respecto das residencias de maiores e ao tratamento nestas de doentes de COVID-19 nas propias residencias ou nas recen creadas residencias integradas habendo sitio en hospitais públicos ou privados. Non é que foran unhas declaracións moi duras coa actuación das consellerías de Política Social e Sanidade, simplemente razoables; pero si discrepantes e, por moito que o neguen, as coincidencias non existen, como se pode extraer dunha nova aparecida en Galicia Confidencial. Aquí, na Galiza, sabemos con quen bailamos e coñecemos as súas mañas. E as coincidencias en certos temas non existen.

Cousas recentes e cousas que fican no tinteiro.

Xa se falou noutro artigo desta xeira do tema das residencias de maiores na Galiza. Non falamos da contratación de persoas sen titulación para atender aos maiores que permaneceron nesas residencias afectadas polo COVID-19. Tampouco nos estendemos na falta de provisión de equipos de protección para os seus traballadores, nin da realización de probas xeralizadas ao persoal dos xeriátricos. Pero imos poñer aquí, polo seu interese, un video que circulou pola rede que contén unha declaración dun traballador dun xeriátrico público cuxo nome é Xan Carlos Ansia, que nos da unha visión moi ilustrativa da actuación do goberno de Núñez Feijóo e o seu goberno respecto das residencias de maiores, actuación que xogou un papel esencial na extensión do virus neses establecementos entre residentes e persoal.

Outro asunto non tratado é o continuado e progresivo despedimento de persoal contratado para atender aos maiores nas residencias intervidas privadas pola Xunta de Galicia, volvendo a deixar aos maiores alí residentes ao coidado do escaso número de persoal contratado polas empresas cuxas actuacións, combinadas coa falta de inspección efectiva da consellería encargada, provocaron numerosos contaxios e mortes entre os residentes nas mesmas.

O mesmo está a ocorrer nos centros sanitarios, onde despois de non renovar contratos ao persoal sanitario e auxiliar que estaba de baixa por enfermidade (que en teoría, e parece ser que só en teoría, deixou de facer cando saiu á luz pública), agora a Consellería de Sanidade está a despedir aos contratados con motivo da pandemia, sen esperar á fin da pandemia, nin aos resultados dos seus propios "estudos", nin ao seu case seguro rebrote, nin para estabilizar os cadros de persoal tanto da atención primaria como da atención hospitalaria.

En fin, xa vemos que baixo a dirección de Alberto Núñez Feijóo, o noso presidente vernáculo, este país, Galiza, non funciona. Polo menos para a maioría da cidadanía. Si funciona para unha millonésima parte da súa poboación, que se fai rica e máis rica a costa do sufrimento dos demais.

E, finalmente, todo o que non se di.

E iso que non temos falado da industria, ou da falla dela e tamén da falla das súas perspectivas. Si o fixemos de paso co comercio e do que sofren os pequenos comerciantes coas políticas dedicadas a favorecer ás grandes cadeas e ás grandes áreas comerciais en detrimento daqueles (e, por riba, a maioría nen se decatan; o cal é moi triste). Tampouco falamos de educación, un área na que impera a política dunha constante vía de privatización e dun abandono da escola e o medio rural que favorece a despoboación e a desaparición da agricultura e a gandería. Nin da política forestal; ou, mellor dito, da política de destrución do bosque e da busca da desertización ao través do eucalipto.

En fin, hai que botalo. A el e aos seus correlixionarios franquistas. Adeus señor presidente vernáculo. Espero que, pese a todos os seus esforzos por enmascarar unha descarada campaña electoral, non volva saír escollido.

Saúde e república.

Falsidades, sen vergonzas e publicidade na época do COVID-19 (A dereita hispana: mentireira e nauseabunda.) (5)

Aínda a risco de quedar moi curto, penso que se podemos poñerlle un cualificativo á dereita que poida resumir toda a súa actuación neste período de confinamento e pandemia é o de vomitiva; e isto polos efectos e sensacións que as súas verbas e o seu comportamento mentireiro e hipócrita provocan. Cando falo de dereita non só estou a falar da dereita parlamentaria franquista e da nazi-fascista, refírome tamén aos seus satélites asturianos e navarros, así como a “socialistas” históricos e pasados como Felipe González ou a fascistas históricos recoñecidos como José María Aznar. Para falar destes personaxes poucas verbas bastan, porque semella haber entre eles unha liña condutora e uns obxectivos que definen o seu comportamento casi coordinado; así que tentarei facelo en bloque, aínda que teña que utilizar algunha referencia persoal de comportamento coma botón de mostra representativo da súa incapacidade política e, sobre todo, da súa incapacidade ética. Isto xa tiña que ir no artigo anterior, pero se así fora a cousa faríase demasiado longa.

A oposición dereitosa no Estado.

En artigos anteriores desta xeira, que leva por título “Falsidades, sen vergonzas e publicidade na época do COVID-19”, xa temos descrito algúns dos vomitivos comportamentos da oposición da dereita franquista (Partido Popular) e da dereita nazi-fascista (Vox) e dos seus satélites en relación a moitas das súas falsidades e hipocrisías e á súa responsabilidade na situación e efectos que a pandemia está a ter nas residencias de maiores, polo que non abondaremos neses temas xa tratados agás para resumir comportamentos. Tampouco distinguiremos entre Partido Popular, Vox ou os seus satélites. O seu comportamento é similar, cando non igual. O mesmo da Casado que Abascal, ou Teodoro García Egea que Espinosa de los Monteros ou Javier Maroto; da o mesmo Cuca Gamarra que Díaz Ayuso ou Rocio Monasterio; como o mesmo ten, a efectos prácticos, Felipe González, José María Aznar, Alberto Núñez Feijóo ou calquera outro deputado ou dirixente de Vox ou do Partido Popular.

ALGÚNS ASPECTOS DESAS POLÍTICAS

As contradiccións sobre a defensa do “destempo” das medidas e de todo o contrario.

É máis que evidente que a actuación dos goberno central en toda esta verbena do estado de alarma causado coronavirus ten moito que criticar. Pero, no fundamental, non aquilo polo que toda esa dereita casposa critica ao goberno. Vaxamos: inicialmente a crítica viu por decretar o estado de alarma e a paralización de múltiples actividades con esa declaración; despois por decretar “con tardanza” o estado de alarma; máis tarde, e coa primeira prórroga do estado de alarma, por decretar o peche do resto das actividades non esenciais. Doutra volta, ao remate do segundo período de recorte de actividades, por determinar a reincorporación destas actividades prematuramente. Non se aclaran. Non vou ser eu quen diga que o goberno actuou con prontitude; efectivamente debeu decretar antes o illamento de certos territorios para evitar que o “bicho” se estendera (por exemplo Madrid e Cataluña). Pero tampouco podemos vou defender as trécolas da dereita. A esta actuación dereitosa eu chámolle “bailar ao son que marcan os empresarios máis irresponsables e desvergoñados” e nalgún caso moi concreto “todo polos votos, que eu sigo en campaña; ou que pensades?”.

Culpar ao goberno das súas eivas e irresponsabilidades.

Outra das actuacións preferentes da dereita estatal, fundamentalmente o franquista Partido Popular, foi a de culpar ao goberno das irresponsabilidades practicadas por gobernos autonómicos da súa corda e obediencia con competencias plenas en sanidade. Falta de equipamentos de protección individual para os sanitarios, escaso número de persoal médico, de enfermería, de celadoras e celadores, falta de camas en UCI, etc. Eivas na sanidade pública que viñeron determinadas polos recortes realizados polos gobernos de Mariano Rajoy, Esperanza Aguirre, Núñez Feijóo, e restantes presidentes autonómicos do Partido Popular na rede sanitaria pública (tanto na atención primaria, como na especializada e como na hospitalaria) coa clara intención de fortalecer os beneficios das empresas privadas de saúde (tanto médico-hospitalarias como aseguradoras). Isto colleu ao sistema público sen equipamentos necesarios para facer un primeiro fronte contra calquera imprevisto grave e, aínda máis contra o COVID-19; a isto xuntóuselle a imposibilidade de acudir con eficiencia ao mercado internacional saturado coa prontitude e axilidade necesaria para dotar aos hospitais e colectivos afectados de primeira liña de medios de protección que impediran os numerosos contaxios do que persoal sanitario, auxiliar e xerontolóxico foron vítimas. Solución dos vomitivos da dereita: botarlle as culpas ao goberno “social-comunista”, que din todos eles, e lavarse as mans da súa exclusiva responsabilidade na falta de medios e equipamentos da sanidade pública. Total esa mensaxe é a que vai ser transmitida masivamente, de forma acrítica e nos lugares preferentes pola case totalidade dos medios de prensa do estado, da súa corda e cuantitativamente a inmensa maioría dos editados no Estado; malo será que entre prensa escrita, televisións e emisoras de radio non fagan comungar á xente con rodas de muíño, coma fixeron os seus antepasados.

O mantra dos pequenos empresarios e dos autónomos.

Por desgraza para a clase obreira, os pequenos empresarios e para os traballadores autónomos son a base electoral da dereita; unha base electoral á que sempre tiveron esquecida mentres gobernaron e á que só acoden cando precisan enfrontarse a medidas de redistribución de rendas que poidan afectar a esa gran burguesía á que a dereita representa. Unha base electoral á que engaiolan con engados e falsas promesas; a proba é que nunca estableceron medidas de carácter económico para impedir que se fundiran, que cando houbo problemas no comercio só gobernaron ao favor das grandes superficies e en favor da usuraria e onerosa política crediticia da banca privada, os dous grandes inimigos dos traballadores autónomos. Unha dereita que na pasada crise, en lugar de establecer medidas para a defensa de pequena e mediana empresa e dos autónomos, desenvolveu políticas de todo tipo que acabaron con máis da metade do que eles chaman “clase media”. Unha dereita que, igualmente, sempre estableceu mecanismos e políticas fiscais que favoreceron á gran empresa e contribuíron a fundir á pequena e mediana empresa, en particular aos traballadores autónomos. Ate as inspeccións de carácter fiscal e laboral fixéronas con toda intensidade sobre este colectivo a sabendas que os maiores defraudadores e elusores fiscais están na banda da gran empresa e da gran burguesía, sobre todo da nobreza parasitaria. Esa dereita, antes xunta e agora dividida entre Partido Popular, Vox e restos humanoides procedentes doutras formacións nas que prescindiron das súas persoas.

As fixacións das dereitas coas manifestacións polo Día Internacional da Muller o 8 de marzo.

É curioso que sexan as reivindicacións das mulleres contra o sexismo social, contra o violencia de xénero e contra as violacións as que convoquen as iras de toda esa caterva de sen vergonzas da dereita. Non me estraña nada desde o punto e hora que, aínda que unha parte trate de disimulalo, se opoñen a todo o que supón unha mellora na discriminación en razón das preferencias sexuais das persoas ou da potenciación dos instrumentos materiais e orzamentarios para a loita contra a violencia machista. E sinalar, tamén, que o Partido Popular si participou (supoño que de mala gana) na manifestación de Madrid do 8-M.

É curioso e indignante que haxa quen ten a caradura de manter publicamente que as únicas concentracións humanas que puideron contribuír á expansión do virus foron as manifestacións convocadas polo movemento feminista; e mais cando ese día estaba cheo de partidos de fútbol con estadios cheos, misas, reunións que agrupaban a un número importante de persoas (o congreso de Vox, sen ir máis lonxe) e outro tipo de eventos con asistencia de público. E que tampouco fixan a súa atención en que, días máis tarde do 8-M, numerosos seareiros do Valencia se desprazaron a Italia para animar seu equipo, ou como estes mesmos agrupáronse en torno ao estadio cando viñeron os italianos en partido de volta a porta pechada; ou en como os afeccionados do Atlético de Madrid que foron a Liverpool acompañando ao seu equipo. Claro que o fútbol deixa pingües beneficios a unha parte da gran burguesía, cuxos intereses son representados polos partidos da dereita.

O “prestixioso informe independente” dun contable australiano sobre a actuación do Goberno de España.

Esta é, quizás, xunto coa denominación de social-comunista que fan do goberno do Estado, unha das mostras de que non existe diferencia entre o partido liderado polo mestrado Pablo Casado e o partido liderado polo mamandurriado Abascal. No debate da última prórroga do estado de alarma ambos sacaron a colación un informe dun organismo prestixioso de Australia que “demostraba” a malísima xestión da crise do coronavirus polo goberno de Pedro Sánchez. Resulta que ese informe foi realizado por un contable sen experiencia nin coñecementos sobre o tema, un contable con ganas de figurar e facer negocios en Singapur que creou un bluff que só parvos ou imbéciles utilizan como argumento e dándolle unha credibilidade como se da Biblia do COVID-19 se tratara. Que lle imos facer? De onde non hai non se pode sacar.

As falsidades continuadas da dereita; incluso en sede parlamentaria.

Na defensa das falsidades e mentiras que circulan pola rede virtual e na prensa que lles da creto e pulo é un especialista o señorito Abascal. Como se foran verdades coma puños, sesión parlamentaria tras sesión parlamentaria, este suxeito nazi-fascista trata de dar credibilidade a toda canta mentira sexista, homófoba, xenófoba ou denigrante para unha sociedade democrática e solidaria circula pola rede; case todas elas procedentes de xentalla da súa contorna ou dos seus creadores de opinión. Ese home ten unha cara tan dura que non se lle cae de vergoña ao mentir tan descaradamente. E no tema do coronavirus non ía ser diferente que noutras ocasións. O máis curioso é que Abascal, cando algún parlamentario doutro partido deixa en evidencia as súas mentiras ou denuncia a súa actitude fascista, sempre recorre ao mesmo: “si usted tuviera que marcharse del País Vasco por estar amenazado por ETA, como tuve que hacer yo...” ou algo así. E volveuno facer no debate da última prórroga do estado de alarma. Eu xa o teño dito anteriormente: era xerifalte e liberado do PP Vasco, cobraba un soldo, e cando sentiuse ameazado escapou coma unha rata; abandonou a outros compañeiros e compañeiras igualmente ameazados, que se quedaron en Euskadi a defender as súas ideas; el preferiu marcharse para Madrid onde Esperanza Aguirre concedeulle unha mamandurria na que aínda hoxe non se sabe moi ben cal era a natureza do seu traballo pero si que tiña unha alta remuneración.

A presunta ocultación do número de mortos polo COVID-19.

Esta é unha constante da dereita franquista e da dereita nazi-fascista. Saben que o número de mortos polo virus é facilitado ao Ministerio de Sanidade polas comunidades autónomas, que teñen competencias plenas en sanidade. Saben, tamén, que cada comunidade autónoma utiliza distintos criterios para contabilizar as persoas afectadas polo coronavirus. E coñecen de primeira man que hai comunidades autónomas gobernadas polos seus correlixionarios que só soltaron as cifras reais de vítimas do bicho cando houbo un decreto que as obrigou a facelo. E son coñecedores de que as comunidades máis afectadas polo COVID-19 son as gobernadas pola dereita, e que Galicia e Madrid son das comunidades que máis mortes presentan en residencias de maiores, cuxa xestión é competencia das comunidades autónomas. Logo, a que xogan cun tema tan serio? Daba noxo o pasado sábado, en La Sexta Noche, escoitar a Maroto culpando ao goberno do Estado das mortes nas residencias de maiores; que desvergoñado! Efectivamente o goberno merece unha crítica moi forte, pero por permitir, sen tomar medidas penais contra os responsables, que se lles faciliten cifras de afectados e mortos manipuladas ou directamente falsas.

Queren políticas económicas en contra da clase obreira e dos máis desfavorecidos.

A estes sen-vergoña da dereita, a eses hipócritas e mentireiros, non lles chegou con aplicar políticas tendentes a facer máis fondas as desigualdades sociais entre as persoas e a condenar a traballadores e traballadoras do Estado Español, condenándoos á miseria e á precariedade durante o mandato de Mariano Rajoy no Estado e co seu mandato en numerosas comunidades autónomas, entre elas Galiza. Non lles chegou con esnaquizar os dereitos políticos e sociais e as liberdades democráticas; con esnaquizar a sanidade e a educación públicas; e con entregar a atención á dependencia a empresas multinacionais lideradas por fondos voitre ás que (polo que se ve e demostra) o que menos lles importa é o benestar e as vidas das persoas maiores e dependentes. Agora, esta dereita ultraliberal e fascista quer seguir a afondar nas desigualdades, quer seguir a favorecer aos grandes empresarios, aos fondos de investimento voitres e á banca, como xa fixeron durante o goberno do franquista Mariano Rajoy e están a facer desde o goberno do noso presidente vernáculo e de vida permanentemente electoralista Alberto Núñez Feijóo e outros polo estilo. Vexamos algunha:

1.- Perlas inesquecibles como as da señora que preside a comunidade de Madrid que mantén que para loitar contra a crise o que hai que facer e “liberalizar o chan para poñer en marcha a construción”. Precisamente unha das medidas postas en marcha non hai moitos anos polo camareiro das Azores, José Mª Aznar, (e que o goberno de Rodríguez Zapatero non se atreveu a anular) que contribuíu a afondar no Estado Español os efectos da crise do 2008. A única explicación que se me ocorre para que esa señora defenda tal despropósito é que poida ter o desexo de que promotores sen escrúpulos volvan endebedarse, vender os pisos e deixalos en esqueleto e sen rematar despois de vendidos; e que os bancos poidan empaquetar eses préstamos a promotores en títulos-lixo e colocalos no mercado con engados a aforradores inexpertos e incautos, como xa fixeron no pasado recente; a consecuencia: a) compradores sen diñeiro, sen pisos e hipotecados ata as trancas; b) promotores enriquecidos de forma ilexítima e sen responsabilidades económicas nin penais sobre as súas promocións en sociedades limitadas -que para iso creou o capitalismo as figuras da S.A. e a S.L.-, con estas descapitalizadas e en concurso, sen poder facer fronte ás responsabilidades cara aos compradores; c) banqueiros e bancos enriquecidos pola dobre vía da colocación dos títulos-lixo e da execución das hipotecas, tanto sobre os solares como sobre os compradores de vivenda. Amais, este país está cheo de vivendas baleiras e de clase obreira empobrecida que non se pode permitir a compra dunha vivenda; igual o que queren é seguir rematando coa pequena burguesía. Eu non sei se estas eran as intencións dese desatino presidencial madrileño, mais tampouco me estrañaría que esas foran as súas liñas fundamentais. A fin e ao cabo, o Partido Popular naceu coa misión fundamental de servir aos intereses do gran capital; e tamén, polo que di algunha sentencia, para beneficiarse economicamente da corrupción dos altos cargos que nomea.

2.- Esta outra perla que demostra que a dereita deste país só defende os intereses dos especuladores e do gran capital ten a súa orixe na Galiza. Neste caso a Conselleira de Vivenda da Xunta de Galicia que dirixíuse por carta ao goberno central queixandose de que a prohibición dos desafiuzamentos durante a pandemia enfriaba o mercado e perxudicaba aos propietarios (nova de eldiario.es; en La Voz de Galicia, Faro de Vigo, Correo Gallego,... por máis que busquei non a atopei ). Como esa señora, coa cantidade de xente que se quedou a dúas velas pola situación de emerxencia sanitaria e que non pode pagar a renda de alugueiro, se atreve a dicir estas imbecilidades? O que tiña que facer ela e o Presidente da Xunta de Galicia era establecer desde un primeiro momento medidas para que os propietarios que dependan do arrendamento de vivenda para poder vivir non teñan que ser desafiuzados das súas; pero non, mellor que inquilinos desesperados e da clase obreira se vaian á rúa. No fondo, coido eu, que a esa señora os pequenos propietarios nada lle importan por moito que se lle encha a boca falando deles; que o que realmente defende son os intereses dos grandes arrendadores, sexan empresas ou fondos voitre. É carta de natureza do Partido Popular.

3.- Frenar a tramitación dos ERTEs e acusar ao goberno central de ser o responsábel do atraso nos pagamentosdas rendas derivadas dos mesmos. Iso si, con escusas varias e diversas que non se corresponden con realidade algunha. Foi o que fixo a Xunta de Galicia e o que o goberno Núñez Feijóo tratou de enmascarar e derivar a súa responsabilidade, contando para elo coa complicidade de toda a súa trama mediática cotiá, tanto da prensa escrita e dixital como das canles de radio e televisión ao seu servizo. Total quen ía sufrir coa demora nos pagamentos ía ser a clase traballadora, cuxos intereses eles, o partido franquista, non representan. Non lle chega coa insuficiencia dos EREs e dos ERTEs, que por riba regatean os cobros aos traballadores; e seguramente estes do Partido Popular, que dirixen a Consellería de Traballo, non me estrañaría que non puxeran a traballar ás inspeccións para ver cantos despedimentos e EREs irregulares fixeron os empresarios aproveitando a pandemia do coronavirus. Desde logo, os sindicatos teñen denunciado máis dun.

3.- Oposición ao establecemento xeralizado dunha renda básica. No último debate os cruzados de Partido Popular e Vox ergueron a súa voz contra o establecemento xeralizado dunha renda básica. Non é que esta medida vaia ser a renda básica universal que demandan as organizacións sociais e os autores que se interesan por aminorar as desigualdades sociais e por mellorar a vida do conxunto dos e das cidadáns. Hai que ter en conta que un partido como o PSOE, que comunga coa doutrina capitalista da economía, non vai lexislar nada do outro mundo no tema dunha renda básica, polo que coido que non van tremer os cimentos do capitalismo; máis ben o farán para que o capitalismo non sexa posto en cuestión. En todo caso, non é de estrañar que os mesmos (que defenden a mesma clase, da mesma procedencia política e ideolóxica, sen escrúpulos sociais, machistas, xenófobos, combatentes contra a igualdade de xénero,... daí o de os mesmos), que o Partido Popular e Vox se pronuncien en contra desta medida. Se a clase obreira non ten ningunha renda de protección estará a mercede dos abusos do empresariado, terá que aceptar calquera traballo que se lle ofreza e nas condicións nas que lles sexa ofrecido; porque terá que facer fronte aos pagamentos de alugueiros, hipotecas, da alimentación de si e da súa familia...; e se ten un pequeno colchón no que ampararse pode rexeitar os abusos do empresariado (que si, que xa sabemos que o empresariado non é todo así, que nolo están a repetir os da CEOE e os da CEPYME unha e outra vez, que non son uns monstros ...pero non poden desbotar as oportunidades que lles ofrece a economía de mercado).

Son botóns de mostra de como a dereita franquista e a nazi-fascista desprezan os dereitos dos traballadores e das traballadoras, de como se aferran ás saias do gran capital e defenden con uñas e dentes os intereses da burguesía e dos seus acólitos.

Un ridículo espantoso; a real e impresentable “marca España”.

Se non fora polo serio que é o tema e porque neste país hai moita ovella con aspecto humano, que crería, sen poñer en cuestión, que o cabalo branco de Santiago Apóstolo é marelo no caso de que a televisión ou a prensa o dixera, a cousa sería para poñerse a rir e non parar. Pero por desgraza non é así.

Miren vostedes ata onde pode chegar esa dereita: non sei se saben que o hospital privado POVISA prestou ao Concello de Vigo non sei cantos miles de máscaras de protección para que este o repartira entre persoas con risco e entre os cidadáns; pois ben, segundo declaracións escoitadas por quen subscribe en Radio Vigo o día 23 de abril dos presentes nun informativo do mediodía, a máxima preocupación dun concelleiro do Partido Popular nesa cidade non era se as máscaras eran suficientes para os colectivos e a poboación viguesa, nin se eran as mellores ou se habería que implementar máis medios para protexer á poboación; a súa principal preocupación estribaba en se o Concello de Vigo ía poder devolver a POVISA a totalidade das máscaras recibidas en préstamo. Incríbel pero certo. É para rirse deles senón fora porque é un tema tan serio que non da.

E esta é xente a que pretende gobernar en todo o Estado, e que xa está a gobernar en partes del. Fodidos estamos. Apaga e ímonos. Menos mal que nos queda Portugal onde, á marxe de diferenzas ideolóxicas, hai políticos serios e políticas serias. Tamén na dereita.

Nota.- Este artigo foi modificado á súa versión actual o día 30 de abril de 2020